Fransa prezidenti Emmanuel Makronun reytinqi ölkədə müzakirə edilən və kütləvi etirazlara səbəb olan pensiya islahatının fonunda son üç ilin ən aşağı səviyyəsinə düşüb.

Bunu IFOP sosioloji xidmətinin bazar günü dərc etdiyi sorğunun nəticələri sübut edir.

Məlumata görə, sorğuda iştirak edən fransızların yalnız 32%-i Makronun prezident kimi fəaliyyətindən razıdır. Bu, bir ay əvvəllə müqayisədə 2 % bəndi azdır.

Təşkilatdan bildirilib ki, 2020-ci ilin fevralında koronavirus pandemiyasından əvvəl də Makronun ictimai dəstəyi eyni dərəcədə aşağı olub.

Fransanın baş naziri Elizabet Bornun da populyarlıq reytinqi 3 % bəndi azalaraq 29%-ə düşüb ki, bu da o, vəzifəyə gəldiyindən bəri ən aşağı göstəricidir.

Qeyd olunur ki, fevralın 9-dan 16-dək keçirilən sorğuda 18 yaşdan yuxarı 2 minə yaxın insan iştirak edib.

Mənbə: TASS