Kanada hökuməti Ukraynaya qarşı genişmiqyaslı müharibə apardığı üçün Rusiyaya qarşı yeni sanksiyalar tətbiq edib.
Bizimyol.info xəbər verir ki, yeni siyahıya Rusiya Federasiyasının dezinformasiya və təbliğatının yayılması ilə məşğul olan 38 fiziki və 16 hüquqi şəxs daxildir.

Kanada Xarici İşlər Nazirliyinin mətbuat xidmətinin məlumatına görə, bu siyahıya, xüsusən "RİA Novosti", "PRIME", "Inosmi", "TOK", "KOT", "Baltnews", rusdilli informasiya resurslarını birləşdirən dövlət media şirkəti “Rossiya Seqodnya”, "Ukraina.ru", "Sosial Naviqator" və "Arctic .ru" daxildir.

"Vaqner" ÖHŞ-in təsisçisi və sahibi Yevgeni Priqojinlə sıx bağlı olan dezinformasiya subyektləri olan Birləşmiş Dünya Beynəlxalq Təşkilatı və Repressiyaya Qarşı Mübarizə Fonduna da sanksiyalar tətbiq edilib.

Ukraynanın işğal olunmuş ərazilərindəki rus qoşunlarına baş çəkərək, Ukrayna ərazilərinin qanunsuz ilhaqına dəstək məqsədilə Moskvada Qızıl Meydanda müharibə və rejim tərəfdarı olan konsertdə çıxış edən müğənni Mikola Baskov da Kanadanın sanksiyalarına məruz qalıb.

Ümumilikdə 38 nəfər Rusiya dezinformasiya agentləri siyahısına daxil edilib. Onların arasında: Mixail Boyarsky, Marat Başarov, Dima Bilan, Larisa Dolina, Nikolay Rastorquev, Oleq Qazmanov, Polina Qaqarina, Nadejda Babkina, İrina Alleqrova, Maksim Averin,Dmitri Dyuzhev, Mixail Qalustyan, Viktoriya Dayneko da var.

2023-cü il yanvarın 27-də Avropa İttifaqı Şurası Rusiyanın bank, maliyyə və enerji sektorları ilə bağlı iqtisadi sanksiyaların təsirinin daha altı ay - iyulun 31-dək uzadılması barədə qərar qəbul edib.

Bir gün əvvəl ABŞ Maliyyə Nazirliyi "Vagner" ÖHŞ və özəl hərbi şirkətlə əlaqəsi olan bir sıra Rusiya rəsmilərinə qarşı sanksiyalar tətbiq edib.

Bundan başqa, Avropa İttifaqı ölkələri Rusiyaya qarşı 10-cu sanksiyalar paketi üzərində işləyir. Bəzi Aİ ölkələri artıq blokun Moskva ilə nüvə yanacağı sahəsində əməkdaşlığı məhdudlaşdırmaq, Rusiya almazlarının idxalına qadağa qoymaq və Kremlin müttəfiqi Belarusla ticarəti kəsmək üçün yeni sanksiyalar tətbiq etməyi xahiş ediblər.