"Keçmiş Müdafiə naziri Səfər Əbiyevin dövründə Azərbaycan Ordusunda baş verən cinayətlər, özbaşınalıq halları, qanunsuzluqlar, korrupsiya faktları zaman ötdükcə bir qədər arxa plana keçsə də yaddaşlardan silinmir, unudulmur. Bəlkə də onun orduya rəhbərlik etdiyi dövr qısa, mənfi halların sayı isə bir qədər az olsaydı, bunlar heç yadda qalmazdı. Amma 19 il nazir işləyən Səfər Əbiyevin “aktivində” o qədər cinayət və qanunsuzluqlar var ki, nə saymaqla bitəndi, nə də ki unudulan”.

Bunu Hit.Az-a adının çəkilməsini istəməyən keçmiş hərbi hissə komandiri, ehtiyatda olan polkovnik bildirib.

O qeyd edib ki, belə hadisələrdən biri də 2009-cu ilin may ayının 28-də, ölkədə Respublika Günü qeyd olunan gün Bakının Qaradağ rayonunun Müşfiqabad qəsəbəsində yerləşən “N” saylı hərbi hissədə baş verib: “Özlərini pis hiss edən, qidadan zəhərləndikləri güman olunan əsgərlər müxtəlif hospitallara, əsasən də yaxınlıqdakı Müşfiqabad qəsəbəsinin poliklinikasına aparıldılar. Təxminən 200 əsgər zəhərlənmiş və xəstəxanalara yerləşdirilmişdi”.

Keçmiş hərbi hissə komandiri zəhərlənmənin əsil səbəbini də açıqlayıb. Onun sözlərinə görə, əsgərlər balıq konservindən zəhərlənib: “Səfər Əbiyev bütün ordunu bazara çevirmişdi və hər şeydən maddi qazanc götürməyə çalışırdı. O, ordunun ərzaq təminatını da özünə yaxın adamlara verirdi. Şəxsi heyət üçün balıq konservlərinin alınmasını isə Elçin adlı ortağına tapşırmışdı. Elçin də harada keyfiyyətsiz, ucuz balıq konservləri vardı, onu alıb gətirirdi. Səfər Əbiyevin bundan xəbəri olasa da, heç bir tədbir görmürdü. Çünki Elçinlə şərik idi və hər ikisini əsgərlərin sağlamlığı qətiyyən maraqlandırmırdı. Onların məqəsdi pul qazanmaq idi və alınan hər ucuz, keyfiyyətsiz mala görə büdcədən milyonlarla manat vəsait silirdilər. 200 əsgərin zəhərlənməsinə səbəb olan balıq konservləri də həmin məhsullardan biri idi”.

O, hadisədən qısa müddət sonra zəhərlənmənin necə baş verdiyinin bütün zabitlərə məlum olduğunu söyləyib: “200 əsgərin zəhərlənməsi çox ağır və ciddi hadisə idi. Qısa müddət sonra bütün təfərrüatlar şəxsi heyətə, zabitlərə məlum idi. Çünki hamı bu hadisədən danışırdı. Belə ki, axşam yeməyində əsgərlərə balıq konservi vermişdilər. Konserv xarab olub, xeyli əsgər onu yeməyib. Amma bəziləri yemək məcburiyyətində qalıb. Axşam yoxlamasından sonra əsgərlərin hamısı qarın boşlğunda ağrı hiss ediblər. Bütün əsgərlər sancılanmaqdan, halsızlıqdan şikayət edib. Bu barədə komandirlərə məlumat verilib, onlar da yuxarı vəzifədə olan şəxsləri məlumatlandırıblar. Çox güman ki, o dövrdə Müdafiə naziri olan Səfər Əbiyevə də məruzə olunub. Amma vaxtında tədbir görməyiblər, nəticədə zəhərlənən əsgərlərin vəziyyəti daha da ağırlaşıb. Sonra onları xəstəxanaya aparmaq məcburiyyətində qalıblar".

Ehtiyatda olan polkovnik vurğulayıb ki, bu hadisə ölkədə böyük rezonans doğurdu, mətbuatda geniş işıqlandırıldı. Onun sözlərinə görə, S.Əbiyev digər məsələləri olduğu kimi əsgərlərin kütləvi formada zəhərlənməsini də ört-basdır etməyə, valideynlərdən, bütün xalqdan gizlətməyə çalışıb, amma buna nail ola bilməyib.

O deyib ki, S.Əbiyevin Müdafiə naziri işlədiyi dövrdə şəxsi heyətin, Azərbaycan əsgərinin həyat və sağlamlığına biganə münasibət göstərilib.

Ölkəpress.com