Deputat qızların təhsil haqqının dövlət tərəfindən ödənilməsini təklif edib

“Büdcədən onkoloji xəstəliklərə ayrılan 47 milyon vəsait çox azdır”.

Olkepress.com xəbər verir ki, bunu Milli Məclisin İctimai birliklər və dini qurumlar, Elm və təhsil, Ailə, qadın və uşaq məsələləri, Səhiyyə və Mədəniyyət komitələrinin birgə iclasında deputat Razi Nurullayev deyib.

Deputat təklif edib ki, icbari tibbi sığortaya 40-50 milyon vəsait ehtiyat kimi ayrılsın: “Elə ailələr var ki, onkoloji xəstəliyə görə ölüm-dirim mübarizəsi aparır. Ayrılan ehtiyat vəsait onların müalicəsinə xərclənsin”.

Deputat illik gəliri 15-20 min olan ailələrdə qız uşaqlarının təhsil haqqının da dövlət tərəfindən ödənilməsini istəyir: “Bu, çox vacibdir. Digər tərəfdən, rayonlarda hazırda istirahət etmək üçün yer restoran, kafedir. Biz bu gün kitabxanaları mədəniyyət mərkəzinə çevirməliyik. Hər rayonda kitabxanalara ayrılan vəsaitin azaldılması yox ,artırılması lazımdır”