Rusiya hüquq-mühafizə orqanları azərbaycanlılara qarşı təhqiramiz ifadələr işlətdiyi üçün döyülən və üzr istəyən şəxslərin videolarını yayımladıqdan sonra “Ortaq Xalq Naminə” (“Vo blaqo obşeqo naroda” – VBON) hərəkatının ekstremizmi ilə əlaqədar araşdırmaya başlayıb.

Reyting.az xəbər verir ki, bu barədə “Radio Svaboda” məlumat yayıb. Rusiya Federasiyası Dövlət Dumasının təbii sərvətlər, əmlak və torpaq münasibətləri komitəsi sədrinin birinci müavini Vasili Vlasov "V Kontakte" sosial şəbəkəsində aktiv olan qrupun fəaliyyətinin yoxlanılması üçün Daxili İşlər Nazirliyinə sorğu göndərib.
Polisə müraciətin səbəbi hərəkat rəmzləri olan videoların yayımlanması olub. Orada Azərbaycan haqqında mənfi danışan insanların döyüldüyü və alçaldıldığı əks olunub. Deputat Vlasov özü sorğu barədə 30 oktyabr tarixində "Kanal 360" saytında məlumat verib.
Hüquq-mühafizə orqanları hələlik təşkilata maddi olaraq kömək edən 250-dən çox insan və bir neçə şirkəti müəyyənləşdirib. VBON-da polis əməkdaşlarının olduğu da iddia edilir.
VBON-un "V Kontakte" sosial şəbəkə qrupunda 2413 iştirakçısı var. Hərəkat üzvləri, onların fikrincə, “ənənəvi dəyərlərə görə xeyriyyəçilik işləri aparır, azərbaycanlıları adətlərə uyğun yaşamağa çağırırlar”. Qeyri-adi davranan həmvətənlərimizi də "tərbiyələndirirlər". Hərəkətləri ən azı xuliqanlıq kimi qiymətləndiriləcək müəmmalı qrupun emblemi və “mübarizə üsulları” çoxlu suallar doğurur. VBON-un fəaliyyəti açıq təxribat qoxuyur və ola bilsin ki, bu üsulla Rusiyada azərbaycanlılara qarşı yeni kampaniyaya start verilir.
Mövzunu davam etdirəcəyik.

Ölkəpress.com