Avtomobil almaq üçün 500 manat beh göndərdi, amma nə avomobili ala bildi, nə də verdiyi pulu. İndi Naxçıvan sakini çıxılmaz vəziyyətdə qalıb.

Pravda.az-ın məlumatına görə, belə bir hadisə ilə Naxçıvan sakini Pəhlivan Əliyev qarşılaşıb.

Onun sözlərinə görə, ötən ayın 27-də avtomobil almaq üçün elan saytlarından bir nəqliyyat vasitəsinə baxıb və elanda qeyd olunmuş mobil nömrə ilə əlaqə saxlayıb. Avtomobili satan şəxs isə maşının Şamaxıda olduğunu deyib. Həmin şəxs Pəhlivan Əliyevə bildirib ki, əgər avtomobili almaq istəyirsə, bunun üçün beh göndərməlidir.

Pəhlivan Əliyev iddia edir ki, Pərviz adlı şəxsə avtomobili almaq üçün ümumilikdə 500 manat beh verib. Üzərindən 17 gün keçməsinə baxmayaraq, Pəhlivan Əliyev həmin şəxslə əlaqə saxlaya bilmir.

Şikayətçinin sözlərinə görə, poçtdan maraqlandıqda məlum olub ki, Pərviz adlı şəxs həmin pulu Şamaxıdan yox, Bakıda yerləşən poçt şöbələrinin birindən götürüb.

Məsələ ilə bağlı vətəndaşı aldatmaqda adı hallanan şəxslə əlaqə saxladıq. Onun 2 mobil nömrəsindən birinə zəng çatmadı, digər ilə əlaqə saxladıqda isə sualı eşidəndən sonra telefonu söndürdü.

Ekspertlər isə tövsiyə edirlər ki, vətəndaşlar elan saytlarından avtomobil alarkən tanımadıqları şəxslərə onlayn qaydada və ya poçtla hər hansı ödəniş etməsinlər. Çünki belə hallar adətən dələduzların qurduqları tələlər olur.



ölkəpress.com