"AXTARIR GÖZLƏRİM" - Dostum Şaiqin dilindən:
Səmada sevirsən hər bir ulduzu,
Laləli çölləri, yovşan, yarpızı,
Gözlərim yoldadır a dağlar qızı,
Axtarır gözlərim, səni axtarır.
Səhər çiçəklərə şeh, jalə düşür,
Mənim qəlbiməsə öz Jaləm düşür,
Sənsiz istidə də bədənim üşür,
Axtarır gözlərim, səni axtarır.
Səni soraqladım ulduzdan,aydan,
Səni soruşmuşam dənizdən,çaydan,
Tapmasam,çıxmaram,vallah bu yaydan,
Axtarır gözlərim, səni axtarır.
Daim qəlbimdəsən,daim yadımda,
Bəlkə də yadından çıxıb adım da,
Sevda yolçusuyam Şaiq adında,
Axtarır gözlərim, səni axtarır.
Vüqar Əhməd