Noyabrın 2-3-də Polşanın Qdansk şəhərində Azərbaycan Gənclər Fondunun maliyyə dəstəyilə “Atəşgah” intellektual oyunlar klubunun təşkilatçılığı ilə IX Beynəlxalq “Azərbaycan Bayrağı” İntellektual Festivalı keçiriləcək.

Azərbaycanın Dövlət Bayrağı Gününə həsr olunmuş festival Azərbaycan İntellektual Oyunlar Federasiyası və Avropa İntellektual Klublar Assosiasiyasının təşkilatçılığı ilə baş tutacaq. “Azərbaycan Bayrağı - 2019” festivalı çərçivəsində “Nə? Harada? Nə zaman?” və “Breyn rinq” oyunları, eləcə də, “QuAZ” intellektual və əyləncəli oyunu üçün turnirlər təşkil ediləcək.
Festivalın təşkilat komitəsinin sədri İlkin Yetirmişlinin sözlərinə görə, tədbir hər il xarici mütəxəssisləri intellektual oyunlar vasitəsilə Azərbaycan xalqının mədəni və tarixi irsi ilə tanış etmək üçün keçirilir.
Redaksiya qrupuna daxildir: Aleksandr Korobeynikov (Moskva), Maksim Merzlyakov (Voronej), Dmitri Borok (Moskva), Dmitri Başuk (Xarkov), Aleksander Kudryavçev (Nikolaev).
Festivalın aparıcısı Yelena Keyranedir. “Azərbaycan Bayrağı” festivalı əvvəllər Riqa, Sankt-Peterburq, Minsk, Vilnüs, Kalininqrad, Kiyev, Praqa və Tallində də keçirilib.

Ölkəpress.com