Xalq yeni həbsləri gözləyir. Həbs ediləcək məmurların siyahısı da bəllidir. Daim qalmaqallarda hallanan Milli Məclisin keçmiş spikeri Oqtay Əsədov növbədənkənar parlament seçkilərindən sonra siyasi karyerasının zirvəsi sayılan parlament sədarətliyini itirəndə artıq onun qələminin qırılması barədə təəssürat yaranmışdı.

Onun MM-nin iclaslarını faktiki olaraq boykot etməsi də bu təssəsüratı gücləndirirdi. Oqtay Əsədov spiker kimi uğurlu kadr hesab edilmirdi. O, “Azərsu” ASC kimi qeyri-siyasi qurumun rəhbərliyindən Milli Məclisin sədarət kürsüsünə transfer olunanda ictimaiyyət bunu təəccüblə qarşıladı. Hər halda, o zaman Yeni Azərbaycan Partiyasından (YAP) deputat seçilənlər arasında siyasi cəhətdən daha yetkin kadrlar var idi. Həmin dövrdə yayılan məlumatlarda bildirilirdi ki, Oqtay Əsədova spiker postunun rəva görülməsi onun siyasi iddialarının olmaması ilə bağlıdır. Bildirilirdi ki, o, əslində, özünü Baş nazir postundan görmək istəyirmiş. Amma hakimiyyətin zirvəsi Artur Rəsizadəni onunla əvəzləmək məqsədəuyğun sayılmayıb.



O, spiker postunu itirəndən sonra Milli Məclisin iclaslarını faktiki olaraq boykot etdi. İslahatlar həm də əsasən oliqarxiyadan ibarət olan köhnə qvardiyanın sıradan çıxarılmasına hesablanan proses olduğundan Oqtay Əsədov da hakimiyyət üçün təhlükəli fiqur hesab edilirdi. Onun “köhnələr”i təmsil etməsi, islahatların, digər oliqarxlar kimi keçmiş spikerin maraqlarına uyğun olmaması, həssas dönəmdə sədaqət anlayışını arxa plana ata bilərdi. Oqtay Əsədovun kənarda saxlanılmasınn əsas səbəblərindən bir bu ola bilərdi.
İndi keçmiş spiker üçün ikinci mərhələ başlayıb. Son günlər Oqtay Əsədovun biznes imperiyası barədə materiallar tirajlanır. Onun Rusiyadakı qalmaqallı biznes strukturu yada salınır və bütün bunların korrupsiya hesabına yaradıldığı bildirilir. Sabiq məmurların həbs olunduğu bir dövrdə Oqtay Əsədovun da biznes imperiyasının gündəmə gətirilməsi onun üçün də həbs təhlükəsini qaçılmaz edir – baş verənlərdən gəlinən qənaət budur. Şübhəsiz bunun siyasi səbəbləri də var. “Dövlət çevrilişi”nə cəhd barədə iddiaların səsləndirildiyi bir dönəmdə Oqtay Əsədovun da gündəmə gətirilməsi arasında hansısa əlaqələrin olduğunu ehtimal etmək olar. (az24saat.org)



Rəfael Cəbrayılov deyir ki, Oqtay Əsədovdan evlər tələb edilirdi

Keçmiş deputatın biznes qurmaq üçün Binəqədini seçməsi təsadüfi deyil. Çünki uzun müddət bu rayonun icra başçısı olmuş Alı Qocayev Oqtay Əsədovun qudasıdır. Rafael Cəbrayılovun tikinti biznesinin çiçəklənməsində onun danılmaz rolunun olduğu bildirilir. Təbii ki, keçmiş deputata dəstək Oqtay Əsədovun sifarişi ilə gəlib. Bəzi iddialara görə, Rafael Cəbrayılovun biznesində keçmiş spikerin də payı var. Onun borclu olduğu vətəndaşlar bildirir ki, keçmiş deputat tez-tez “bunların hamısı mənim deyil, şefimin də payı var” deyərək Oqtay Əsədovu ortağı kimi təqdim edirmiş. Rafael Cəbrayılovun borclu olduğu şəxslərə gəlincə, onlar Binəqədə rayonu ərazisindəki “Gənclər şəhərciyi”nin “toru”na düşüblər. Həmin vətəndaşlar burada mənzil almaq üçün deputata külli miqdarda pul veriblər. Amma nə mənzili ala biliblər, nə də verdikləri pulu. Rafael Cərbayılovun “Gənclər şəhərciyi” bu adamları qocaldıb.
Rafael Cərbayılov müxtəlif bəhanələrlə onların pullarını qaytarmaqdan yayınır. Vətəndaşları borcu qaytaracağına inandırmaq üçün ən ağlagəlməz üsullara əl atır ki, bunlardan biri də mandatını girov qoymaqdır. Bu məsələ ictimailəşəndən sonra Rafael Cəbrayılovun deputat karyerasına son qoyulub. (arqument.az) İndi isə məlum olur ki, Rəfael Cəbrayılov borclu olduğu vətəndaşlara deyib ki, Mehriban Əliyeva Oqtay Əsədovdan evlər tələb edib. Oqtay Əsədov isə məcbur olub və Heydər Əliyev fonduna “Gənclər şəhərciyindən” evlər verib. Ona görə də, problem yaranıb.



Müsavat.com isə xəbər verir ki, Oqtay Əsədovun gözü qapıdadır, hər an istintaqa çağırılacağının səksəkəsini yaşayır. İri ranqlı korrupsionerlərin “içəri” göndərilməsi onu da təşvişə salıb. Eks-spikerin təşvişi üçün çox ciddi əsaslar var. Ötən illərin mətbuatını vərəqləmək, sosial mediada yazılanlara baxmaq onun ölçüyəgəlməz biznes imperiyasının ayrı-ayrı fraqmentlərini görməyə kifayət edir. 14 il parlamentin sədri postunu tutmuş Oqtay Əsədovun bu müddət ərzində adı qarışmadığı korrupsiya əməli qalmadı. Onun deputatlarla bağlı məlumatları “dövlət içində dövlət” qurmuş Eldar Mahmudova ötürməsi də aşkar-gizli fəaliyyətinin pik nöqtəsi idi. Bəs bunu o, niyə, nəyin qarşılığında edirdi?
Mal-mülk, sərvət toplamasına “yaşıl işıq” müqabilində etməsi şübhə doğurmurdu. Kənardan belə görünürdü ki, spikerin pul hərisliyi sonsuzdur. Çox təəssüf ki, sonradan üzə çıxanlar da bu təəssüratı təsdiqləmiş oldu. Tutduğu posta rəğmən, Oqtay Əsədovun Eldar Mahmudovun qapısına getməsi illərlə deyilənlərə möhür vurmuşdu. İllərdir Oqtay Əsədov xalqdan oğurlanan pulların sərməstliyini yaşamaqdadır.
Spikerdən deputat pilləsinə enəndən sonra Milli Məclisin iclaslarına da qatılmağı özünə rəva bilmir. Sulutəpədəki imarətində oturub Türkiyədən Rusiyaya, Rusiyadan Böyük Britaniyaya uzanan böyük biznesini idarə edir. Əslində Oqtay Əsədovun korrupsiya içində itib-batdığını görmək üçün çox da uzağa getmək lazım deyil. Bu gün onun sığındığı imarətinin nataraz ölçülərinə diqqət edib, fotolarına baxmaq yetərlidir. Bütün məmur-oliqarxlara xas dəbdəbə sevgisi Oqtay Əsədovdan da yan keçməyib. Onun imarəti 3-4 hektarlıq sahədə inşa olunub. Hələ spiker olarkən imarətinin peyk görüntüləri yayılmışdı. “Bura Oqtay Əsədovun imarətidir” açıqlaması olmasaydı, görüntüləri görənlər düşünərdilər ki, ərəb şeyxlərindən birinin cah-calalına tamaşa edirlər. Ərazidə 2 günbəzli, dəbdəbə içində itib-batan imarət, çay evi, iri hovuz, yaxınlarının villaları, özəl fitnes və bilyard salonları var. Belə imarətlərdən biri də Bakının Şüvəlan kəndi ərazisindədir. Az qala, dənizin içinə girmiş həmin imarətində olduğu kimi burada da iri tennis kortu diqqət çəkir. Oqtay Əsədov Tennis Federasiyasının prezidentidir deyə, elə bilir ki, bu sahə onun şəxsi mülkiyyətidir. Odur ki, saysız-hesabsız imarət və villalarının hündür hasarları içində tennis kortları da mütləq şəkildə inşa olunur. Şüvəlandakı 2 hektardan artıq ərazini əhatə edən dəbdəbəli imarətin ərazisində də xaricdən gətirtdiyi mütəxəssislər tərəfindən biri açıq, digəri qapalı olan 2 tennis kortu və futbol meydançası quraşdırılıb.




Spiker postunu itirməkdə olduğu müddətdə məlum olmuşdu ki, Oqtay Əsədovun həyat yoldaşı Zemfira Əsədova Nyu-Yorkun Linkoln meydanı ətrafında (Adagio Condominium) dəyəri 1 milyon 825 min dollara 2 otaqlı mənzil almağa razılaşıbmış. Son anda isə bu razılaşma pozulmuşdu. Bununla belə Əsədovlar ölkə xaricində bahalı mülk almaq sevdasından vaz keçməyiblər.
Oqtay Əsədovun kürəkəni Mehman Qocayevin Londonun ən bahalı bölgələrindən olan St. Johns Wood-da 1 milyonluq mülkü var. O bölgədə ki, orda ölkənin ən zəngin milyarderləri, məşhur aktyorları və pop-divaları yaşayır. Həmin mülklə bağlı yayılmış sənədlərdə bildirilirdi ki, penthauzun alınması üçün “Goldbek Investment” şirkətinə milyon funt vəsait ödənilib. Əmlakın alınması tarixi Mehman Qocayevin doğum günü ilə üst-üstə düşür. Bu, o deməkdir ki, penthauzu Mehman Qocayevə bağışlayıblar. Londonda, milyarderlər məhləsində evi adama ad günü hədiyyəsi olaraq bağışlayıblar. Hədiyyəni alan isə Zemfira Əsədovadır – Qocayevin qaynanası. Penthauzu Mehman Qocayevə doğum günündə o bağışlayıb. Bakıda uşaq bağçasının müdirəsi işləyən Zemfira Əsədovanın maaşı, əlbəttə ki, penthauz əldə etməyə yetər, sadəcə maketini ala bilər. Əsədovların kürəkəni çox bahalı, yüksək sürətli avtomobillərə meyillidir. Onu adətən 12 silindrli, 200 min avro dəyəri olan AUDI A8L WW12 -də gəzən görürlər.




Bağça müdirəsinin Moskvanın Bakı küçəsindəki striptiz klub sahibəsi olması da korrupsiya əlaqələrinə susqun şahiddir. Oqtay Əsədov hələ spiker olduğu günlərdə Moskvada, Bakı küçəsində, 29 ünvanında yerləşən obyektdə xüsusi əməliyyat keçirilib. Moskva polisinin Narkotik Nəzarəti İdarəsinin əməkdaşları bu ünvanda yerləşən “Kapriz” adlı sauna-striptiz kluba qonşuların şikayəti əsasında getmişdi. Orada narkotik maddələrin satışı ilə bağlı əməliyyat baş tutmuşdu. Bəli, spikerin ailəsinə məxsusluğu sənədlərlə təsdiq edilən barda antinarkotik əməliyyatı gerçəkləşmişdi. Sənədlərdən görünürdü ki, “Kapriz” striptiz klub Oqtay Əsədovun həyat yoldaşı Zemfira Adil qızı Əsədovanın adına rəsmiləşdirilib. Klubun təsisçisi olan “Arizarum” Qrup Məhdud Məsuliyyətli Cəmiyyətinin təsisçisi də Milli Məclisin sədri Oqtay Əsədovun həyat yoldaşı Zemfira Əsədovadır. “Arizarum” Qrup MMC 10 min rubl Nizamnamə kapitalı ilə qeydə alınıb. O dövrdə “Kapriz” striptiz klubunun real bazar dəyəri 10 milyon 629 min ABŞ dolları qiymətləndirilirdi.
Zemfira Əsədovanın Moskvadakı hüquqi və sosial ünvanlarından biri də “Triumph Palace”da ( “Zəfər Palas”) yerləşir. “Triumf Palas” Moskvada ən hündür yaşayış binasıdır. Daha dəqiqi, böyük bir kompleksdir. Həm də yalnız Rusiyanın deyil, Avropanın da ən yüksək yaşayış binasıdır. Çardağı ilə birgə hündürlüyü 214 metr, qülləsi ilə birlikdə isə 264 metrdir. Oqtay Əsədovun həyat yoldaşı Zemfira Əsədova bu binada 2 lüks mənzilin sahibidir. Bunlardan birinin dəyəri təxminən 2-2,5 milyon dollardır. O birinin dəyəri isə 5-6 milyon dollara qədər yüksək ola bilər.



Məsələ burasındadır ki, bu kompleksdə mənzillərin sayı mərtəbə yüksəkliyinə görə dəyişir. Nə qədər hündürdürsə, o qədər bahadır. Zemfira Əsədovanın aldığı mənzillərdən biri “Triumf Palas”ın 12-ci (65 nömrəli mənzil), o biri isə 37-ci mərtəbəsində (372 nömrəli mənzil) yerləşir. Əsədovların binadakı qonşuları da məşhur simalardır. Məşhur aktyor Oleq Tabakov, müğənnilər MakSim, Dima Bilan, top ulduz Lolita və digərləri Əsədovlarla qonşudurlar. Əsədovların ixtiyarında olan 65 saylı mənzilin pəncərələri üzü Kremlədir, pəncərələr döşəmədən tavana qədərdir, çox otaqlıdır, 250 kvadrat metr sahəsi var. Mənzildə fitnes və kitabxana, spa-otaq, hətta kinoteatr belə var. Oqtay Əsədovun Bakı ətrafındakı bütün imarətlərində də kinoteatr mütləq və mütləq nəzərə alınır. Mənzildə böyük salonun bir divarı boyu dünyanın məşhur şərab markalarından olan “Petrus” nümunələrindən ibarət kolleksiya düzülüb. Mənzildəki mebel təchizatına təxminən 1,2 milyon dollar xərclənib. Mənzil barokko üslubunda işlənib, cilalanıb! Əsədovlar Rusiyada taunhauslar, kotejlər, mənzillər, dükanlar, avtoyuma mərkəzləri, striptiz klublar və saunalar, restoranlara sahibdirlər.



Bəs bunca varidat sahibini narkotik satışı kimi çirkin, lakin gəlirli sahəyə meyilləndirən nədir?

Əsədovun xalqdan oğurladığı çirkli pulları xaricdə, lap elə Rusiyada inşaat, ticarət, xidmət kimi nisbətən daha təmiz sahələrə yatırmaq imkanına malik olmasına rəğmən, niyə narkotik alverinə baş vurmasının səbəbi bilinmir. Bu gün də bu məsələ açıqdır. Əsədovlara bağlı “Kapriz”də kokain kimi “kübar” narkotikin satışının təşkili həm də Əsədovun daxili aləmindən, hərisliyinin sərhədsizliyindən xəbər verirdi.
Spiker olarkən adı deputat mandatı qarşılığında Rəfael Cəbrayılovdan 3 milyon pul alması iddiasından tutmuş Türkiyədə ekzotik quş biznesinə qədər gedib qarışmışdı. Oqtay Əsədovun ailə üzvləri xalqdan oğurladığı milyonları hesabına Türkiyədə quşların və heyvanların satışı ilə məşğul olan bir necə böyük ferma açıb. 12 hektarlıq ərazini tutan fermada bahalı ekzotik quşlar bəslənir ki, onların bir başının qiyməti 900-1000 dollar arasında dəyişir. Məsələn, təklif edilən Miro, Türk taklası quşlarının birinin qiyməti təxminən 900 dollardır. İstanbuldakı quşxanada minə yaxın belə qiymətli quş bəslənir. Satışa çıxarılan quşlarla yanaşı, digər ev heyvanları da var.




Bu söhbət ortaya çıxarkən Türkiyədə yaşayan məmurlardan biri demişdi ki, Əsədovlar ekzotik quş və heyvanları endirimli qiymətlərlə Türkiyə Böyük Millət Məclisinin üzvlərinə təklif ediblər. Onun sözlərinə görə, Oqtay Əsədovun qohumu orda bir neçə şəxslə görüşərək, onlara yaxşı qiymətə ekzotik məhsullar təklif edib. Eks-spikerin Türkiyədə çox sayda biznes obyektlərinin olduğu da yeni xəbər deyil. Onun xalqdan oğurladığı pullar Antalyadan tutmuş Bodruma qədər, Nişantaşıdakı ofislərə, Orta Köydəki evlərə və obyektlərə qədər səpələnib.

Xalqdan illərlə milyardlar oğrulayıblar, xalqın pulunu yeyiblər, bu gün adamların əllərində talançılıqla əldə etdikəri böyük pullar var. Hansıların ki, alınması zamanıdır. Bunun üçün Səlim Müslümov kimi “içəri”yə yola salınmaları şərtdir. Öz xoşlarına xalqdan oğurladıqlarını xalqa qaytaran deyillər. Bu düstur həm də eks-spiker üçün keçərlidir. (musavat.com)
Qeyd olunmalıdır ki, Milli Məclisin inzibati binasında oliqarxiyadan təmizləmə prosesi çərçivəsində keçmiş spiker Əsədovun bütün şəkilləri Parlamentin elektron səhifəsindən götürüldü. Prezidentin tapşırığı ilə, yeni spiker xanım Qafarova əfsanəvi nəhəng spiker kreslosundan imtina etməsi olub. Deputatlar zarafat edirdi ki, “Əsədov özünü Sezara oxşadır”. O məşhur kreslodan ki, uzun illərdən bəri “özünü buraxmış” Oqtay Əsədovun simvolik taxt-tacı hesab olunur və az qala, iki nəfərin yerini tuturdu. Məclisdə, kulis arxasında danışılır ki, yeni sədr bütün deputatlara bir siyasi mesaj olaraq bu addımı atıb və onlara “sadə olun” demək istəyib. Eyni zamanda, deputatlara tapşırılıb ki, xaricdə mülk almağa qadağan edilsin və ailə üzvlərinin öz aparmalarına deputatlar nəzarət etsinlər.
Oqtay Əsədovdan sonra diqər qalmaqallı oliqarx məmurlar da həbs olunacaqlar. Bu il xalqı böyük sürprizlər gözləyir.(anaxeber)




ölkəpress.com